[ابو جرير]

لمثقفات العانســــــات !!

شفتي يا أم سعد .. سويّر بنت أم خالد اللي خذت الماجستير العام .. وصلت لـ 26 وما بعد تزوجت !! .. أقول ما تخبرين لها أحد حتى ولو كان متزوج ثلاث ؟! "
- لا والله ماخبر احد لها ومن يبيها بعد هالعمر ... قلعتها من قالها ترفض هالعرسان علشان دراستها .. بالله وش نفعتها فيه هالشهادة ؟! "

هذا مقطع من بعض ( السواليف ) الحريميه .. اللي ما يمر يوم ألا ونسمع مثلها .. وحتى ولو ما كانت قضيه .. ألا يخلون لسويّر مشكله هي وأمثالها ..
طيب .. ليه ما ناخذ فنجال .. وعلوم رجـــــــال ؟!

" - أقول محمد .. ما نويت تعرس ؟!
- ألا والله ودي .. عندك أحد ؟!
- أبشر وأنا أخوك .. بس ما قلت لي وش المواصفات اللي تبيها ؟!
- أبغاها زينه ( وهو نحول ) .. وطويله .. بس ما تكون أطول مني ( وهو طوله ما يتعدى 160 لو يصوّر اربعة في سته كان طلع كله في الصورة) .. وصغيره ما أبغاها تكون فوق العشرين ( طبعاً ما يحتاج أقول لكم أن أخينا في الله عمره 32 ) .. وما أبغاها جامعيه ( لأنه دبلوم ويخب عليه بعد ! ) .. وأن كانها بتسكن معي عند أهلي يكون أحسن !! (طرار ويتشرط ) "

هاااااااااه .. وش رايكم في اللي يصير ؟!
صحيح أن فيه كثير من البنات اللي يتعداها قطار الزواج مما يجعلها تتعلق بأي خطيب يتقدم لها دون أن تشترط شروطاً كانت تتمناها من قبل ، علشان كذا ما تهتم بمنصبه ولا مكانته ولا عمره ولا حتى شكله .. يعني تطب وهي مغمّضة المسكينة.
هذه الفئة غالباً ما تنحصر بين الطبيبات والمثقفات .. لأن مواصلة التحصيل هو همها الأكبر ولا تفكر في الزواج إذا حست أنه راح يحرمها من طموحها .. وهو الحصول على درجة علميه عاليه .. تتطلب الكثير من التفرغ .. وهذا ما لن يرضاه معظم الرجال السعوديين .. وبعضهم يأخذها زوجة ثانية أو ثالثة مهوب حب فيها لكن طمع بفلوسها ولسان حالة يقول : تفك ازمة أحسن من هالعجز اللي عندي اللي صايرات مثل بلف السخانة يأخذ ولا يعطي.
فمن المسؤول هنـــــــــا ؟!

بعض الناس يوجه اللوم للمرأة نفسها ويرى أن المثقفة يجب أن يكون مصيرها إلى العنوسه ( ظل الحيطه ) لأنها رفضت أول طارق لبابها بحجة مواصلة التحصيل العلمي .. في حين أن عادات المجتمع وتقاليده تكره للرجل أن يتزوج وحده عمرها 25 أو أكبر .. ويعتبرونها ( بايره ) !! هذا اذا ماودوه اهله للمطوّع يقرأ عليه.

ومهوب كذا وبس .. فيه بعض الرجال ما يحب الواحد منهم أنه يتزوج وحده تساويه في الثقافه أو تزيد عليه .. لأن هذا تنزيل من قدره .. يعني يبي يفتل شنباته قدام زوجته ويستعرض بثقافته ومعلوماته حتى ولو كانت خاطئه ، وانه هو اللي فاهم كل حاجه .. لكن إذا كانت زوجته مثقفه ما يقدر يسوي كل هذا لأنها بتنشب في حلقه وبتناقشه حتى تبين له أنه غلطان .. وطبعاً الرجل بكبريائه وأحياناً لعدم ثقته في نفسه ما يرضى بهالشي وأنتم خابرين الرجال عندنا ( اللي ما يدري وش الطبخه .. عليه الرجوع إلى كتاب الرجل السعودي دراسه تحليليه نظريه .. تأليف : أبو نشقه ) ..

نجي الأن لـ السؤل الأهم :
ليه الزواج يكون قتل لطموح المرأه ؟!

ما يحتاج تجاوبون .. تعبنا من الكلام .. فقط مزيداً من الوعي !!

من................قول


أبو جرير