لوله تصير العمر صدك الك محترف
وعيوني بس عالدرب ويه الملامح ترف
امحه العدو والنذل يگلبي وامحه الترف
واترك وصال النذل لاترتچي وصله
وبنار جمر العشك ارد احرتك وصله
ولفي العشگتو عمر ما يعترف باصله
واضحلي انو صدك بس بالغدر محترف
من يوم فركاك صارت ياحلو وان بي
انته تبي وين يمعود وانه وين أبي
تدري العمر صار بيت من الجمر وانأ أبي
من حيث تعبان ومااكدر تعبني بعد
مشغول بجروح مااكدر أوصفهن بعد
أن تدري الفرح شال بجفاك وعليه بعد
والعمر ميفيد من بعدك بعد والنبي
إشــعندك عـله ديـرتي رايــح عليهـه إوراد
لا تـظن عـــنـدي الــك تلگــه الجــواب اوراد
حســـبالك انســـه المضـه وانثر الدرب اوراد
عـقـدتـك يــا صـاحـبي مـا بيـهه ابـد كـل حـــل
لايـــوم عني اسئـــلـت ولا گــلت كيف الحــــال
حـچـــي الـعـواذل عـجـب بـيني وبـينـك حــــال
وفـرگــتـنـه صــارت هـدف .. للـي تـمنه إوراد
يســحر حــلو مبسمه تـفـاح حاوي برد
اشكثر شوك ارسلت ما منه احضه ابرد
ضلوعي ألأله حامـيه طايــح عليهه برد
ما خلـه منهن عـدل جزهن ابقسـوه وتل
ومــا ادري شـنهو بعـد يجره عليّه وتال
ظـليت اون ممتـحـن .. ذبني بأعالي التل
لا هـمته دمـعتي .. ولا گـال ياخــذ بــرد
يا صاح وصلك , بعدك فرح ما يلي
تعال شوف و استمع و احكم على ما يلي الحزن عندي عدل بس البخت مايلي
البخت ما ينعدل بالدنيا لا باخرة
و هموم كلبي جذب ما تشيلهن باخرة
الدرب الجنت باوله هسه صرت باخره
و الناس صادت سمج و آنه الصفى ماي لي
ظليت اداوي اجروح كلبي ولا منجلي
اعتب على خلتي انخه ولا منجلي
فريت برويحتي بلجن اجد منجه الي
جناز كاصد غرب ادفن شبابي ورد
وركض وره المنخه بلجن يطكن ورد
وبجي على مصيبتي وسجب مدامع ورد
والناس كله احصدت وانه انكسر منجلي
ملطوش